Ahecha Ypane hyjúi morotî
Oñoañuãnguévo y Paraguaýndie
Hory che resa, cheañuã pirî
Chepiremondýi che pýgui che akãme
Che ahy'o ojuguy py'atarova
Añemo'ãguîvo che rekohaitégui
Ahecháma Puente Chácope ohasáva
Ha Puértope ajávo cherasê vy'águi
Péinako hasýpe, táva Concepción
Ne memby tee ojevy ndeypýpe
Ku imitã'imírõ nderejava'ekue
Yvýgotyo ohóvoanga jepy'apýpe
Ahecha heta ambue tetã
Ndajuhujepéi ndeichaite iporãva
Ne ñu, ka'aguy, nde yva, nde ysyry
Ahechaga'úgui che képe ahecháva
Ko'águi ahamíta plaza ñemuhápe
Upépe ajuhúne ñane rembi'u
Pastel mandi'o, mbeju raviru
Ha chipaguasu ikesu hajúva
Taipyte hi'ári mokõi, mbohapy
Naranja eíra Peguahógui oúva
Ha upéi taguapy ha taterere
Pohã ro'ysãgui ku hyakuã asýva
Amboguehag̃ua techaga'ueta
Asêta aguata Itacurubíre
Ha upéi taipykúi Ruta Quinta ykére
Pya'e tag̃uahê Belén pytã'íme
Hi'ãguîma upégui Paso Urunde'y
Pyhare mboyve ajámane upépe
Tañañuãmi che tio Luchi
Víctor, Chelopi, Chálo ha Felipe
Tañandu ysapy che py nandiguýpe
Pyharevete tahasa Lemos-pe
Taijayvu tetêu, karãu, pitogue
Añemboasajévoma Loma Pytãme
Kane'õ mboyve upépe apytáta
Hasýpe ahecháta Julio ha Sekúpe
Ha taorerasê oremandu'ávo
Lorenzo, Crescencio, Mimiro je'óre
Loma Kokuerére jeguata sambópe
Taikytî tape, taguejy pe ñúre
Tachemboy'umi Ykua Sauce upérõ
Ajevy jeývo chereñoihaguépe
Ahechasetéma che pehênguekuéra
Ursino, Peíto, Papachín ha Mauro
Toribio, Lalito, Inocencio, Mario
Félix, Karaícho, Rubio ha Nonino
Roñembyatypávo tío Aurelio rópe
Leli ha Valerio bandoneón joyvýpe
Mbaraka che irûndie taguapy mbytépe
Ta'e che vy'a purahéi ryrýipe
Toîke guari, tahecha irarírõ
Hipólito Lesmo, karia'y hekópe
Toiko jeroky, totimbóke yvy
Tañaroko'êke ayvu ha torýpe
Heta aiko rire pe ára rapóre
Cheañomi rei mborayhu reka
Tupã toipota taipo'o cheave
Concepción poty ha tapytáma ápe
Karia'y iporãva mombyry che rãigui
Che ajupatónma ave amo ipahápe
Peguahomiguávagui ndajavypáiri
¡Néike, lo' kuña! Aime pende pópe
