Che ñembokihápe ahayhu porãgui
Hogaitépe aháva amokunu'ũ
Ore ypyetépe ijapyka ári
Isy oguapýva iñe'ẽngatu
Che ao ndaha'éire casimir hepýva
Mericanomígui la che kamisa
Che kasõ mboka, che pynandimíre
Ña Kande he'ima che ndavaleiha
Ma'erã angápa jererohorýpe
Pe nderakykuéri rereko mante
Mboriahu apĩme, ni ivaka'ỹva
Ña Kande imembýpe he'i cherehe
Teju asajéicha pe kokue rapére
Guyra apikuévo oiko ndereka
Aguara popéicha ñande rokupére
Ñemombe mombépe nderehe omaña
Ñemombe mombépe nderehe omaña
Chemoñeko'õire Ña Kande he'íva
Umi kavytãicha chejopi asy
Ha'éma voi tahendy hendýva
Amoñuhãmíta Ña Kande memby
Opa mba'erãicha upe pyharépe
Poncho ñemondéme kirirĩme aha
Aturuñe'ẽ tatakua ypýpe
Ha upépe oúma la che kichîha
Po'ave hag̃ua ajúvo upégui
Ahecha hendýva pláta rerekua
López-rõguare kambuchi mokõi
Anohẽhague pya'e herakuã
Che virumaha Ña Kande oikuaávo
Chererochichĩ ha chemoporã
Registro Civílpe la chemyakãsãvo
Imembykuñándie oipota aha
Imembykuñándie oipota aha
Ko'águi ha péguio, che parientekuéra
Ko'ág̃a osẽma hory joaite
Ña Kande avei cherayhu gua'úma
Chembokuasetégui chemongele'e
Ndehegui akáire, Ña Kande, aháta
Mombyry nde ypýgui piro'y reka
Ha juruhe'ẽreveko rohejáta
Ivaka hetáva reheka hag̃ua
Ivaka hetáva reheka hag̃ua
