Grau, die Stadt un grau es dä Strom
Bloot es rud un alt es dr Dom
Minsche krümme sich elend vör Nut
Prunk un Stöötz - em Dreck litt Brut
Mol se dir schön - von mir us en Jold
Mol se dir heil - dann drääs de kein Schuld
Mol, dat se dir et letzte noch nemmp
Mol se rich - un alles stemmp
En dieser Stadt jitt et jode un schläächte
Schwache un Starke met jet en dr Mauh
Ärme un Riche un Linke un Räächte
Einer es brav - dä andre schlau
Alt die Stadt - doch innerlich jung
Schwer verjeff' un doch hätt se Schwung
Schrief: He liejen de Lück en dr Soot
Schrief: He jitt et Lück met Moot
Alles stemmp - un alles stemmp nit
Schlag ne Ärme dann beste en quitt
Klüngel es e krank Sediment
Wer drüvver laach, die Stadt nit kennt
Mer fiere vaterstädtische Feste
Karneval fiere sujar schon uns Pänz
Mer sin em fiere noch immer de Beste
Dat met dr Heiterkeit nemme mr äänz!
Kölsch heiß' Bier - katholisch es Kölsch
Paafe un Puffs - Jeschwüre der Zigg
Rotz un Wasser, kriesche nur mer
Dr Kreech es noh - die Hoffnung wigg!
Pänz sin frech un Kinder han Jlöck
Schlemm die Stadt - doch ich kumm zoröck
Vell es mies un dat ben ich satt
Ich vermess nur die Lück us dr Stadt
Lück met Jewesse un Lück met Jewehre
Fremde un Türke - dr Tünnes un Schäl
Schloppkrade, Hillije un stolze Prolete
Liebe määt jung un Neid määt jääl
Ov sööss oder bitter - du muß övverlääve
Jot oder schlääch - et es uns Stadt!
