Ik hadde veur mien moder
Es bleumkes met ebracht
Zee kwammen uut ons naober's hof
Dat moch wel, ha'k edacht
De naober wier lebendeg kwaod
En mama krek allens
Ik had bloos zeute willen waen
Ik kreeg een maoltjen op de pens
Mien eerste deerntjen was Katrien
Ik wazze vieftien jaor
Met heufd en harte en hande
Ston ik altied veur eur klaor
Ik hielp op schole met spieken
En kreeg daorveur een een
No is zee meester-doctorandus
En wil mi-j neet meer zeen
Nooit good of 't duch neet
Wa'k probeer
Nooit good of 't duch neet
Immer kump 't daor op neer
Al doo'j ok nog ow beste
En aos i-j dagenlank
't Is nooit good of 't duch neet
I-j kriegt enkel stank veur dank
Ik was 's naor een feest ewest
En leet den auto staon
Miene bene wollen neet meer good
Ik kon neet lieke gaon
De plietsie vroog o'k donne was
Ik zei: "Ko'j dat neet zeen?"
Too most ik met de kaste in
Kiek dat vin'k now gemeen
De kinder neumt mi-j olden gek
Maor ik bun nog kreuzfideel
A'k 's aovends op de buhne stao
Dan geet 't krimineel
As jongen god stoef ik dan rond
En spaor de botte neet
Maor 'n andern dag lacht zee mi-j uut
Umdat 't lopen neet meer geet
