In t landschop van voelwottergoaten gruit aaltied oaventuur
k Loop voak eem in dij wereld doar wel vief kwartaar in t uur
Ik floit de goldvink noar mie tou, wie hebben wat proaterij
Terwiel dat n keudeldoemke n kraai verneukt mit zien zingerij
De hoaneschrobber draigt boven t bos mit dood en verdaarf
n Raaiger zuikt zien stee op t Schot en spoit mit widde vaarf
En as de haarst zien zail loat zain en t gruin moakt stee veur gold
t Leste swaalfke zuikt t zuden as t leste bloadje vaalt
Din heurk inains de kollen doar hoog aan duutse zied
Ze kommen van t Wad noar Westerwolle, blieven hier tot veurjoarstied
De zunne stoat leeg, zien sjars is vot in dizze leste doagen
Ik noar huus, goldvink gait mit en liekt mie wat te vroagen
Refraain:
Ik verzoep in mien gedachten in n mengelmous van geluud
Of t nou zummer, veurjoar, winter is dat moakt din nait meer uut
In t landschop van voelwottergoaten gruit aaltied oaventuur
k Loop voak eem in dij wereld doar wel vief kwartaar in t uur
Mit n winstgevuil van twiefel mit drang om haard te vluiken
Mor k hol mie stil omreden dat ik heb hier niks te zuiken
k Bin hier n dail van d eerde zo aaltenduvel klaain
Sums bin k het speur wat biester, sums wil k het speur nait zain
De vrömdeling op de Laidieke vindt zokzulf n haile guut
t Is Maimoand waarm en diezeg de tied dij wil veuruut
Zien neefke, n gele gorre perbaart Beethovens viefde aals mor weer
t Is n drokte van jewelste, boeren binnen met jirre hin en weer
Twij holtdoeven op n takke snoetjekovveln mit mekoar
Blaauwsteern daanst boven t wotter op t zulfde stee geliek as t leste joar
