Roege luchten boven t boerenlaand
Treurende bomen laangs de raand
Sprutters vlaigen massoal noar t zuden
In t oosten heur k n klokke luden
Zunnebloumen op Maarke bluien
Lucht mengt kleuren en tovert buien
K Blief eem stoan, k bin hier ja toch
Dit bin ik nait dit is Van Gogh
Refr.:
n Schildersdouk is Grunnen mien laand
Vaarft deur Vincents golden haand
De Stad is Montmatre, Westerwolle n stil leven
t Hogelaand n zunnebloum, honderd joar is mor eem
n Korenveld mit maaiers, t douk is zo groot
n Miljoen is n miljoen en stoede is brood
n Boomgoard mit veul rood, rose en geel
n Zulfportret kiekt op mie deel
n Swaarver mit strohoud zien ainzoamhaid
Raitpenne en linnen waiten wat hai wait
Twaalf bloumen en knoppen in n gele voas
Koolzoadvelden mit n gruine woas
k Blief eem stoan, bin hier ja toch
k Kiek as n schilder, k kiek as Van Gogh
